Opplev Nilsenslippen i sommar

Ei heilt unik oppleving

Visste du at du kan drive ein heil maskinpark med 80 meter drivreimer, eller lage ei bandsag med eit sykkelhjul? Kva verktøy og utstyr trengte ein for å reparere ein båt på 50-talet? Bli med oss på omvising på Nilsenslippen og lær meir om dette med oss!

I sommar tilbyr vi omvising i Nilsenslippen til alle som ynskjer eit unikt innblikk i vår nære historie.

Kva var Nilsenslippen?

Nilsenslippen var ein verkstad for små og mellomstore båtar frå 1935 til 1987. Ein slipp er bana eller rampa der båtane vart trekt opp på land for reperasjonar. Verkstaden bestod av ei smie, ein verkstad for trearbeid og ein mekanisk verkstad. Båtane kom ikkje med bruksanvisning eller merkevarelager. Dei laut finne ut kor feilen var sjølv, og øydelagde deler måtte dei lage på plassen. I dette beskjedne verkstadbygget klarte herr Nilsen og sonen Herman Nilsen å reparere det meste dei fekk opp på slippen.

Nilsenslippen og Kystmuseet

Nilsenslippen låg sentralt plassert i Skudalen i Florø sentrum. Når byen skulle får seg kjøpesenter tidleg på 90-talet, måtte den utdaterte verkstaden rivast. Bygget med maskiner og interiør vart flytta opp på Kystmuseet og sett opp att på vårt område i 1992/93. Sidan den tid har det vore fleire typar aktivitetar i bygget.

I 2020 starta Kystmuseet eit omfattanda restaureringsarbeid på Nilsenslippen. Dei komande åra har vi vølt opp heile bygget, fått bygd opp smia og plassert ut verktøy og anna interiør i bygget. Men rosina i pølsa er maskinparken til herr Nilsen. Alle maskinene er restaurerte og nye drivreimer er montert slik at vi kan starte dei opp slik som når verkstaden var i drift. Her får du sjå drebenkar, smergelslipar, søylebor og fleire andre maskiner i drift. Alle maskinene vert drivne av ein motor og drivreimer!

Bli med på omvising og få eit unikt innblikk i den tidlege overgangen til motoralderen! Det er interessant både for dei som har opplevd den sjølv og for dei som har vekse opp i "stikkontaktalderen".