Velkommen inn i årets utstilling
Nikolai Astrup er ofte skildra som «heimen og familien sin målar». Han måla ofte barndomsheimen sin, prestegarden i Jølster, og då han og Engel Astrup flytta til Sandalstrand, vart også den nye heimen deira eit sentralt motiv. I den nye utstillinga "Ein kreativ heim" møter du Nikolai nettopp på heimebane, med familie og kvardagsliv som set kunsten i eit nytt lys.
Myteknusing
Ei seigliva myta om Nikolai Astrup er at han kom frå ein fattig heim utan interesse for kunst og kultur. Denne forteljinga står sterkt i ein lang tradisjon der kunstnarliv vert skildra som ei helteforteljing, der geniet mot alle odds blir kunstnar. Ny forsking knuser myten om Astrup som ein einsleg og merkeleg begava kunstnarspire.
Heimen som læringsmiljø
Ved å sjå på betydninga av familien som institusjon, og heimen som kulturelt miljø, trer kunstnarskapen i større grad fram som eit fellesskap med forgreiningar i fleire kunnskapsmiljø. Ei brikke inn i denne utstillinga er kunstnaren si mor Petra Astrup, som ofte har vore gløymd i forteljinga rundt Nikolai, men er løfte fram i nyare tid grunna hennar koplingar til vevmiljøet i Jølster.
Verka i denne utstillinga er valde ut for å belyse verkstadkulturen rundt Nikolai – eit kollektivt og kreativt samspel i Astrup-familien. Somme av dei er lånte inn frå private eigarar og har ikkje vore synte i tunet sidan Engel og Nikolai Astrup si levetid.
Eit nytt blikk
Kurator for utstillinga, Kesia E. Halvorsrud, tok si PhD-avhandling i 2023 med tittelen "Gutteboken som kompositum. Nikolai Astrups samling av barne- og ungdomstegninger". Hennar forskning har spesielt løfta fram Petra Astrup, som både lærar og støttespelar for Nikolai. Kesia er til dagleg prosjektleder og kurator ved Nikolai Astrup forskingssenter ved Kode i Bergen.