– Det er mange høgdepunkt, men Kystdagen er ein god tradisjon hjå oss, der vi samarbeider med mange lag og organisasjonar. Her får ein verkeleg ein smak av kystkultur og -historie, seier Holme.
Det skjer 14. september. I tillegg til museet sine eigne attraksjonar og utstillingar, som å ro ein tradisjonell open trebåt, kjem Sjøspeidarane, Soldalen besøksgård, Fjordane friluftsråd, Flora Husflidslag og mange til for å syne fram ulike aktivitetar.
– Så er vi veldig glade for å vere ein del av Kinn kommune sitt kultur- og aktivitetsprogram «Lev vel». Tre torsdagar denne hausten inviterer vi til faglege føredrag på dagtid. Desse arrangementa pleier vi å ha fullt hus på, seier Holme.
Temadagar
I haust får ein lære om jektefart på Vestlandet, bli med den avdøde Florøkunstnaren Bjørn Hegranes på ei fotografisk reise og om Norges første marinbiolog, Michael Sars.
Familiar med barn får også noko å velje i fram mot vinteren. Museet vert søndagsope ein gong i månaden, kvar med ulike aktivitetstema som også barn kan vere med på. I tillegg vert det ope i haustferien. Då lovar Holme et løft for poteta.
– Potet har vore viktig for kystbefolkninga i mange hundre år, og vi har vår eigen vesle åker. Her får vi hjelp av barnehage og skuleklassar til setjing og opptak. I haustferien får vi sjå på måtar å bruke poteta på, seier Holme.
Endra opningstider
I sommar har museumsvert Hilde Wiik gått av med pensjon. No er Kystmuseet på leit etter ein erstattar. I perioden stillinga vert ståande tom, nyttar Kystmuseet mogelegheita til å teste ut nye opningstider.
– I mange år har vi hatt ope på dagtid gjennom veka. Tal besøkande er så få at vi i ei normal veke i vinterhalvåret kan telje dei på ei hand. Det er svært ressurskrevjande å halde ope for så få gjester. Vi ønskjer heller å konsentrere innsatsen om arrangement og halde meir ope i helgene når folk flest har fri, seier Holme.
Ho rår publikum til å sjekke opningstidene her og legge planar ut frå det. Endringane byrjar 15. september, og vil vare fram til ny museumsvert er på plass. Etter det vil museet evaluere endringa.
– Vi har hatt utfordringar med driftsbygningane våre. Vi har brukt mykje ressursar på det, og mindre på å utvikle tilbodet vårt. Vi venter på løyvingar over statsbudsjettet for å sikre både bygga, kulturarven og tilboda våre til publikum. Samtidig ser vi at publikum prioriterer oss når vi har relevante arrangement. Difor legg vi meir vekt på det, enn å ha mest mogeleg ope ei stund framover no, avsluttar Holme.
Program på Kystmuseet
14. september: Kystdagen – møt Florø sjøspeidere, redningsskøyta og Elias-båten, bygg din eigen fantasibåt, lær å renske krabbe, prøve å ri på hest, lag ditt eige tau med Husflidslaget, blir med og rydd på stranda med Fjordane friluftsråd, prøv smia i Nilsenslippen og prøv å ro ein gamaldags trebåt.
22. september: Fiksekveld med Flora Turlag og Flora Husflidslag. Vi har toppa laget for å kunne hjelpe deg med å fikse turkleda som treng ein liten reparasjon for å bli gode som nye att.
25. september klokka 12.00: Jektefarten på Vestlandet ved museumsleiar Anne Kristine Moe ved Holvikejekta Nordfjord Folkemuseum.
5. oktober, 7-10. oktober og 12. oktober: Haustferiedagar på Kystmuseet, poteta i våre hjarte.
23.oktober klokka 12.00: På reise med florøkunstnaren Bjørn Hegranes. Den avdøde kunstnaren etterlet seg ei stor fotosamling, bli med på reisene hans og så kva som inspirerte han. . Florøkunstnaren Bjørn Hegranes si fotosamling. Samarbeid med Jotunets venner.
27.november klokka 12.00: Norges første marinbiolog Michael Sars la grunnlaget for mykje av forskinga si medan han var sokneprest på Kinn på 1830-talet. Føredrag ved museumsleiar Annette Langedal Holme ved Kystmuseet i Sogn og Fjordane.
30. november. Familiesøndag der vi markerer inngangen til advent. Graut til kystnissen - om han tørr å komme fram?
13. desember. FamilieLAURdag. Luciafeiring med tog gjennom museet. Håper Lussi er i godt humør!
