Omvising på Kystmuseet

Er dykk ei gruppe som treng litt kulturhistorisk påfyll? Då kan ei omvising på Kystmuseet i Sogn og Fjordane være tingen! Vi tilbyr fleire ulike omvisingar og kan tilpasse dei etter behov og ønske.

Omvising i båthallen

I båthallen fortel utstillinga om korleis båten har vore heilt sentral for livet langs kysten. Her finn du også ein av dei flottaste juvelane i samlinga vår: Bakkejekta frå 1750. Saman med formidlar frå museet kan dykk få dykke djupare ned i historia om tida då segl og årar tok oss ut på fiske, til kyrkja, og på reise mellom by og bygd.

Omvising i Bataldebua

På Prestholmen finn du ei gammal sjøbu med grå tømmerveggar og oransje tak. Opphaveleg stod bua på Batalden, og var i bruk i perioden på 1800-talet da mange fiskarar og oppkjøparar trakk til Kinn-distriktet for å delta i det rike sildefiske. Her tok dei imot silda og salta den i tønner. På slutten av 1920-talet blei bua flytta til Sunnfjord museum, som den gong låg i Førde sentrum. Da museet flytta til Movika blei ikkje bua med på flyttelasset. Den vart i staden demontert og lagra i Florø heilt fram til Kystmuseet blei stifta og museet tok over eigarskapet. Bua blei gjenreist på museumsområdet i Florø i 1992.  

I dag huser bua ei fast utstilling om sildefiske i Kinn-distriktet, samt ei utstilling om sild og havforsking i andre etasje. Ei omvising på Bataldebua gjev ein smakebit av korleis det var å arbeidde med silda under det rike sildefiske på Vestlandet - frå fiske, til foredling, til sal av sild som handelsvare.