Sjå føre deg eit lite arbeidsrom med furupanel, målingflekkar og tørkefiller. Midt på golvet, ein karusell driven av ein symaskinmotor, påmontert åtte huntonit-plater. Ved sidan av, ein mann med ein visjon og ein pensel. Ein veldig rask og effektiv pensel.

– Vi kallar dei strandamålarane. Det var nokre bønder frå Stranda i Nordhordland som på 1940-talet fekk den ideen at dei kunne tene pengar ved å lage kunst for folk flest på «samleband». I løpet av ein 20 års periode målte dei, og andre som let seg inspirere av dei, om lag ein halv million bilete, seier museumsleiar Mayra Henríquez ved Kunstmuseet i Sogn og Fjordane.

Har du eit slikt måleri?

Dette var måleri som kven som helst kunne skaffe seg. For 5 til 20 kroner, eller 200 til 300 kroner etter dagens kroneverdi, kunne ein henge opp ein liten draum på veggen. Bileta vart selt over heile landet. Kanskje har du sjølv, foreldra eller besteforeldra dine eit slikt bilete hengande i stova, på hytta eller pakka vekk på eit loft?

– Vi planlegg ei utstilling med bilete frå desse målarane, med opning 21. mars 2024. Dette er ikkje vanleg å finne i kunstmuseum sine magasin, så då lyt vi høyre med innbyggarane. Vi er ganske sikker på at det finst tusenvis av desse bilda her i Sogn og Fjordane, og håpar at mange av eigarane får lyst til å vere med på dette løftet, og låne oss bilda sine. Vi vil gje plass til alle saman i høgsalen her hjå oss på Kunstmuseet, seier Henríquez.

Utstillinga av kunstnarduoen Alt går bra heiter «Kunst i dei tusen heimar». Dei to har tidlegare laga liknande utstillingar i Bergen og Lindås. I tillegg til å vise fram bileta til strandamålarane, lagar dei eigne kunstverk, installasjonar og skaper omgjevnader med lyd og video for å gjere synleg kva desse måleria betyr for folk.

I folk sine hjarte

– Dette er bilete som korkje kunstverda eller akademia har brydd seg om før Alt går bra byrja å undersøke fenomenet tilbake i 2019. Måleria har ein viktig plass i innbyggarane sine hjarte, og har på sitt vis skapt ei felles førestilling om det norske landskapet. Historia seier også noko om kor viktig det er for folk å ha kunst på veggane, seier Henríquez.

Ho håpar at mange ønskjer å vere med og vise fram sine eigne bilete i Sogn og Fjordane si eiga storstove for kunst. Henríquez drøymer om fulle veggar med idylliske landskapsbilete.

– Kvart einaste av desse bilda har ei historie. Teknikken, kunstnaren, motivet, salet, kven som kjøpte det eller har arva det, kvar det har hengt eller kvifor det har blitt pakka ned. Eg drøymer om ei utstillingsopning med masse folk som deler historier om sine eigne bilete. At vi kan få ei samtale om kva kunst rundt i dei tusen heimar betyr for folk, avsluttar Henríquez.

Usikker på om du har eit strandamåleri? Finn det fram og samanlikne det med bileta ovanfrå eller bilda synt fram i denne reportasjen frå Norge Rundt. Nedanfor finn du kontaktinformasjonen og opningstidene våre.