Tidleg i oktober kom det ut ei ny bok om ein av dei viktigaste kunstnarane i Sogn og Fjordane på 1900-talet: Frå Olden til Paris. Bildekunstnaren Rolv Lorentz Muri (1921-1992) av Ove Eide. Søndag 5.november held han føredrag om kunstnaren og bilda hans i Sogn og Fjordane Kunstmuseum.
Tittelen er eit sitat av Muri: «Kan arbeida mine hjelpe folk til å sjå nye sider ved landskap og miljø er eg nøgd»
Rolv Lorentz Muri (1921-1992) var utdanna frå Statens Kunstakademi, var fleire gonger representert på Høstutstillingen og Vestlandsutstillinga og fekk Statens garantiinntekt for kunstnarar frå 1977. Som profesjonell kunstnar valde han å slå seg ned som bonde i Nordfjord, langt frå nasjonale kunst- og kultur-institusjonar. I dette lokale landskapet fann han motiva sine, men forma var internasjonal, knytt til impulsar og inspirasjonar frå Europa og USA. Slik var han både stadbunden og utovervend.
Ove Eide vil ta oss med på ei reise gjennom Muris bildeverd, frå 1930-åra til 1990. Han vil sjå Muris liv og kunst i lys av tida han verka i, staden der han fann motiva sine (garden og landskapet i Olden og Indre Nordfjord) og nokre sentrale verdiar, knytte til ein panteisme og ein sterkt naturvern-engasjement.
Rolv Muri ønskte å få oss til sjå på naturen med nytt blikk. Og det trengst kanskje – i ei tid med auka medvit om naturvern og klimakrise?
