Om utstillinga
Korleis rører liva våre ved andre typar liv? Kva samanhengar kan oppstå, og kva gjer samanhengane med oppfatninga vår av verda?
Biletkunstnar Marianne Morild har arbeidd med desse problemstillingane i måleria og leirskulpturane ho syner fram i denne utstillinga.
Den surrealistiske utstillingstittelen skapar mange biletlege assosiasjonar og sparkar i gang førestillingsevna vår. Utsegna er henta frå Shakespeare sitt skodespel As You like it (norsk tittel: Livet i skogen, gjeve ut i 1623). I stykket er karakterane i eksil i skogen, Shakespeare søkte å skildre korleis naturen erstattar sivilisasjonens ting:
Og dette vårt liv, unnateke offentleg tilhaldsstad, finn tunger i tre, bøker i rennande bekkar, preiker i steinar og godt i alt.
Marianne Morild (f.1972) har mastergraden MA Fine Art Degree frå Central St. Martin’s College of Art i London. Ho bur og arbeidar i Bergen. Verka hennar har vore stilt ut ved mellom anna Kunsthall 3,14 (Bergen, 2021), Centre Pompidou-Metz (Frankrike, 2021) og Taipei Biennale (Taiwan, 2020).
Utstillinga kan få oss til å tenkje på ei framtid der naturen og respekten for andre sine liv står i sentrum: planter og dyr, men også liva til andre menneske. Vi kan drøyme om ei verd med ein annan verdsorden enn den vi har gjort oss avhengige av i dag.
Draumar er tema for Førdefestivalen 2023 og utstillinga er årets festivalutstilling.
Sogn og Fjordane Kunstmuseum varetek kunstsenterfunksjonane i region Sogn og Fjordane. Separatutstillinga utgjer ein del av kunstsenterfunksjonane