Marianne Morild - Tunger i tre, preiker i steinar

Om utstillinga

Korleis kan vi finne håp i ei omskifteleg verd prega av naturtap og klimakrise? Korleis kan vi finne fram til noko som gjer at vi kan kjenne oss sjølv att i naturen, som kanskje gjer til at vi har meir empati med andre vesen, og dermed handsamar dei på ein betre måte?

Utstillingstittelen er henta frå Shakespeare sitt skodespel Livet i skogen som vart gitt ut i 1623, og skildrar korleis naturen erstattar det sivilisasjonen har skapt.

Etter ein lang periode med sorg over det vi gjer med naturen, freista Marianne Morild å finne noko som kunne løfte desse tankane, og skildre dei i sine måleri og leirskupturar. For Morild låg svaret i ei lita tue med lav, som vaks på ein stubbe. Forma på dei ørsmå vekstane i den vesle kolonien, fekk ho til å tenke på korleis mennesket til alle tider har samla seg for å halde ting, for å be, gjere opprør eller samtale.

Dette slektskapet mellom so ulike levande vesen vart utgangspunkt for ei kunstnarleg utforsking. I arbeidet med måleria til utstillinga i SFKM har ho og henta inspirasjon frå portalane i stavkyrkjene, der menneske, dyr og plantar vert vevd saman i intrikate og uløyselege mønster. I desse bileta får naturen spele hovudrolla, og dei små livsformene tar menneskelege proporsjonar. Utstillinga er på mange måtar ei slags samtale med naturen, der den betraktar oss like mykje som vi betraktar den.

Sogn og Fjordane Kunstmuseum varetek kunstsenterfunksjonane i region Sogn og Fjordane til og med 2023. Separatutstillinga utgjer ein del av kunstsenterfunksjonane.