Norsk reiselivsmuseum – 10 år på reise
Den 29. april 2016 opna Norsk reiselivsmuseum formelt dørene i Balestrand. No, snart ti år seinare, ser me attende på ei innhaldsrik og mangfaldig reise.
Høgdepunkt frå ti år med formidling og aktivitet
Sidan opninga har museet vore ein stad for utforsking av norsk reiselivshistorie, både dei store linjene og dei nærare, menneskelege forteljingane. Gjennom faste og mellombelse utstillingar, foredrag, seminar og arrangement har me vist korleis reise, arbeid, kunst, handverk og møte mellom menneske har forma både lokalsamfunn og nasjon.
Blant høgdepunkta frå desse åra finn me:
Utstilling om fotografen Wilhelm Anton Georg Dreesen (1840-1926) - fotograf, globetrottar, påverkar
Utstilling om regionale vevtradisjonar, der handverk, materialkunnskap og lokal identitet har stått i sentrum
Utstilling om kaien som møteplass, ei forteljing om ankomst, avreise og om korleis Balestrand vart eit knutepunkt for reisande frå inn- og utland i regionen
Utstillinga om Catharine Hermine Kølle (1788–1858), den kvinnelege kunstnaren, forfattaren og vandraren frå Ulvik, som utfordra si tid og etterlet seg eit heilt særeige livsverk.
Utstilling om hesteskysstradisjonar, ei påminning om reiselivet før motoren tok over
Vandreutstillinga «Hytta – fire veggar rundt ein draum», som har nådd ut til eit breitt publikum også utanfor Balestrand
I tillegg har museet vore vertskap for ei rekkje føredrag, seminar og arrangement, mange av dei knytte til høgtider og tilbod særleg retta mot barn og unge.
Møteplassar for kunnskap og samarbeid
Museet har òg vore ein aktiv arena for faglege møte og samarbeid, mellom anna:
Seminar om sveitsarstil (2021) i samarbeid med Fortidsminneforeininga og Balestrand Sogelag
Nasjonal konferanse for kulturforsking: Reise (2022), i samarbeid med Forening for kulturforsking
Catharine Hermine Kølle-symposium (2024) og Pattern Language (2024) i samarbeid med Kunstbygda Balestrand
Seminar om vev og vevtradisjonar (2025), med fokus på både tradisjon, souvenirproduksjon og attåtnæring
Takk for støtta – lokalt og internasjonalt
Norsk reiselivsmuseum opplever stor støtte lokalt. Folk i bygda og regionen har vore, og er, utruleg flinke til å støtta opp om aktiviteten vår. Det er me utruleg takksame for. Samstundes er me i hovudsesongen heilt avhengige av våre internasjonale gjester. Balestrand er, tross alt, ei reiselivsbygd og museet er ein del av denne levande historia.
Me vil retta ein stor takk til alle som har besøkt oss gjennom desse ti åra, og ein heilt særskild takk til alle våre gode samarbeidspartnarar som har bidrege sterkt til våre utstillingar, seminar og foredrag. Også takk til dugnadsgjengen vår, som stiller opp og hjelper til med både stort og smått og dei lokale handverkarane/ fagfolka som alltid stiller opp for oss.
Utan dykk alle hadde ikkje reisa vore den same.
Vidare ferd
Ti år er ein milepåle, men samstundes eit utgangspunkt. Me gler oss til ferda vidare, til nye utstillingar, nye samarbeid, nye møte og nye forteljingar.
Takk for dei første ti åra!