Rolv Muri (1921-1992) er ein av dei største modernistiske målarane frå vår region. Denne utstillinga viser eit stort utdrag frå hans produksjon gjennom 50 år som kunstnar.
Jeg ser abstrakt. Hele min legning er abstrakt. Når jeg arbeider på jorda, samler jeg abstraherte naturbilder i minnet. Jeg er ikke av dem som ser natur og så konstruerer abstraksjoner etterpå. Jeg ser det slik jeg maler det.
– Rolv Muri, Sunnmørsposten 27.8.1976
Nordfjordingen Muri stod gjennom heile karrieren i spagaten mellom biletkunst og gardsdrift. Om sommaren gjekk det i hardt fysisk arbeid på den vesle og bratte slektsgarden på Auflem i Olden. På nattetid og i vinterhalvåret, fekk essensen av alle naturinntrykka han hadde samla opp, utløp i fargesterke måleri. Muri reproduserte ikkje det han såg, men skapte nye landskap. I denne utstillinga inviterast publikum til å komme tett på abstrakt ekspresjonisme og oppleve stemningane som skildrast i dei store uttrykksfulle måleria. Samansetninga av sterke fargar, former, liner og flater gjev oss høve til fri assosiasjon og til å sjå naturen med nye auge.
Ein skal ikkje forstå kunst. Kunst skal ha ein appell til kjenslene. Picasso snakka alltid om sanning. Eg er samd i det. Det ein lagar skal vere ekte. Eg dreg ut essensen av naturopplevinga.
– Rolv Muri, Sunnmørsposten, 17.12.1988
Fylkesgalleriet i Sogn og Fjordane si retrospektive utstilling med Muri i 1991 var hans første separatutstilling i museal samanheng. No ønskjer museet å løfte fram dette store og innhaldsrike kunstnarskapet for nye generasjonar og publikum.
Sogn og Fjordane Kunstmuseum rettar ei stor takk til forfattar Ove Eide, private utlånarar og Sparebankstiftinga Sogn og Fjordane for støtte til utstillinga.
