Vest. Verk frå Birger Mowinckels samling

I denne utstillinga vil publikum for første gong sjå verk av meistrar som J.C. Dahl, Kitty Kielland, Anders Askevold og Anna-Eva Bergman på Kunstmuseet sine veggar. Med Vest utvidar vi vårt vanlege regionale fokus frå Sogn og Fjordane til heile vestlandskysten, og viser verk frå 1840 og fram til i dag.

Vest er resultatet av eit tett samarbeid med Birger Mowinckel (f. 1927) og hans familie, som har lånt ut over 50 verk til utstillinga. Mowinckel har samla på kunst frå vestlandet i ei årrekkje, og samlinga er av dei største privateigde som består av vestlandskunst. Musea i Sogn og Fjordane har også supplert med verk frå eigne samlingar til utstillinga på Kunstmuseet, og totalen omfattar 62 kunstverk.

Utstillinga gjev eit tematisk innblikk i vestnorsk kunst- og kunsthistorie med fokus på migrasjon, kunstnarmiljø, økonomi og næring. Her møter du både anerkjende kunstnarar som har sett sitt preg både på norsk og internasjonal kunst, og skaparkrefter som i dag er mindre kjende.

Meistermøte

Vest er ei utstilling som byr på kunstnarar som er mest vanleg å sjå hjå dei store musea i Norge. J.C. Dahl er rikt representert på museumsveggar i Bergen og i Oslo. Det same gjeld Anna-Eva Bergman og Kitty Kielland. Verk frå desse kan opplevast på Kunstmuseet gjennom dei neste månadane. Vi finn sjølvsagt plass til våre mest kjende, i form av både Gunnar S. Gundersen, Oddvar Torsheim, Ludvig Eikaas, Kjartan Slettemark og Nikolai Astrup.

Oversette kunstnarar får stor plass

Utstillinga byr også på ei rekkje verk frå kunstnarar som er gløymde, og som av ulike årsaker ikkje har fått same merksemda som andre. I Birger Mowinckel sine samlingar har vi funne ei rekkje skattar, av kunstnarar som mange vil oppleve som ukjende. Mange av desse er kvinnelege kunstnarar, og dei gjev vi ekstra stor merksemd gjennom utstillinga.

Felles for alle kunstnarar som er representert i utstillinga, er ei form for tilknytning til den vestlege delen av Norge.