Planlegg besøket ditt

Kvernsteinsparken ligg sentralt i Hyllestad kommune, berre nokre steinkast frå sentrum. Innkøyring til eigen p-plass via Hyllestadvegen 406 (Cirkle K). Ope tysdag til søndag kl. 11-17 i perioden medio juni - medio august, og elles på førespurnad. Frå resepsjonen ved elva tilbyr vi formidling i det historiske brotlandskapet, familievenlege aktivitetar og utstillingar i tradisjonelle grindehus med ulike funksjonar.

Kvernsteinsparken
Hyllestadvegen 402
6957 Hyllestad

I sommarsesongen tilbyr vi enkel servering i resepsjonen ved elva, og byr m.a. på ferske sveler og peparkaker, samt varm og kald drikke. Tilbodet er tilgjengeleg for alle, også utan billett, i tidsrommet 11:30-16:30.

Mot billett er våre besøkande velkomne til å nyte medbrakt mat og drikke på museumsområdet. Spar Hyllestad ligg i gangavstand frå museet. Høve for grilling i museet si opningstid.

I museumsbutikken finn du eit utval kvalitetsvarer og gåveartiklar frå lokale produsentar. Vi tilbyr m.a. souvenirar i ekte granatglimmerskifer, handlaga keramikk, plantefarga garn og kunstnarlege kjøkenhandklede. Museumsbutikken er open for alle, også utan billett, i museet si opningstid.

Kvernsteinsparken har eigen parkeringsplass for besøkande, like ved museumsportalen. Bussar parkerer langs muren mellom Circkle K og museumsportalen.

Merk at camping ikkje er tillate på parkeringsplassen eller nokon del av museumsområdet.

Nedre delar av Kvernsteinsparken med p-plass og bygningar ligg i relativt flatt terreng og er knytt saman med grusvegar. Deler av steinhoggarløypa og Storehuset er også tilgjengelege for rørslehemma. Turstiar gjennom visningsbrotet held enkel standard og er ikkje eigna for rullestol eller barnevogn. Det er diverre ikkje universelt utforma toalett i parken.