Har du tenkt over kor kjøtet du et kjem frå? Kva med kleda dine? Kva materiale består tinga dine av, og kven har laga dei?
Årets temporære utstilling på Nordfjord Folkemuseum er Dyrebar!
Skøyter laga av bein, kompress laga med grisebust og lykter laga med kumage. Dette er nokre av tinga du kan sjå i vår nye utstilling.
Utstillinga viser eit utval av måtane folk før i tida nytta seg av heile dyret. Både før og etter dyret blei avliva, ser vi ei haldning om at ingenting ikkje var godt for noko, og ingenting skulle kastast.
Frå dagens perspektiv kan ferdigheitene og kunnskapen folk brukte i kvardagen verke både kreative og oppfinnsame. Tinga dei lagde kan verke finurlege og til tider morbide. Men for dei var dette vanleg og naudsynt. I ei tid før pengeøkonomi, plastikk, elektrisitet og butikkar var den ressurssterke sjølvforsyninga nødvendig for å overleve. Det var ikkje noko alternativ.
