Utstilling: «Hans Dahl – Med hjarta for Balestrand»
23. mai – 30. september 2026
Denne sommaren opnar Norsk Reiselivsmuseum ei ny utstilling om Hans Dahl (1849–1937), ein markant og omdiskutert målar i Balestrand sin kunstnarkoloni. Dahl var i si samtid kjent langt ut over landegrensene for sine lysfylte skildringar av fjordlandskapet, ofte med glade menneske. På heimebane fekk Dahl lite anerkjenning i det rådande kunstmiljøet, men for omverda vart motiva hans eit symbol på «det vakre og autentiske Noreg».
Frå slutten av 1800-talet spelte både kunsten hans og livet han levde i Balestrand ei viktig rolle i framveksten av turismen i regionen. Villa Strandheim, dei store hagefestane, omgangskrinsen og det nære venskapet med keisar Wilhelm II løfta bygda fram som eit internasjonalt reisemål. For mange vart Dahl sitt blikk på Sognefjorden ei dør inn til norsk reiseliv, kunst, natur og nasjonalromantikk.
Utstillinga slepp oss tettare inn på mennesket Hans Dahl og har som mål, ved å visa måleri, skisser, fotografi, film og gjenstandar, å formidla ulike aspekt ved Dahl sitt liv i Balestrand. Vidare håper vi at utstillinga vil gje besøkande innblikk i eit liv som var prega av humor, pågangsmot og ei sterk overtyding om at eigen kunst primært skulle spreie lys og glede.
Velkomen til opninga 23. mai – og til ein sommar med Hans Dahl!