I somarsesongen kan du oppleve ein levande, tradisjonell museumsgard– Indre Sogn tunet. Her kan du vere med å stelle dyra, prøve deg på gardsarbeid og lære om korleis ein dreiv gard i Sogn på 1800-talet.
Garden er i drift, og kulturlandskapet vert helde i hevd av både folk og fe. Sau og kyr av gamle rasar beitar på markene og grisane rullar seg i søla. Bli kjent med dyra på garden og hjelp bonden å gje dei mat og stell. I åkrane vert det dyrka potet, kålrot, bygg og lin, og frukttrea bugnar av epler og kirsebær. For å sikre nok fòr til dyra vert trea lauva og graset vert slått med ljå og hengt på hes.
I år testar vi ut betre stell i den artsrike enga vår ved Prestegarden. I enga veks orkideen brudespore, saman med det vakre hjartegraset og minst 60 andre planteartar. No har det blitt svært mykje mose i enga. Det er problematisk for blomsterplantene som veks her. Sommaren 2025 prøver derfor museet i samarbeid med Høgskulen på Vestlandet ut metodar for å dempe mosen.
Tidlegare var det mykje fysisk arbeid heime på gardane. Nokre vanlege arbeidsoppgåver var å bera vatn, saga ved, og å slipa ljå. I tunet kan du prøva korleis det er å bera med vass-sele, saga ved, og dra slipesteinen.
På museumsgarden er det også tid til leik, og du kan prøve styltene våre eller kanskje hoppe i høyet? Haugastova er hovudhuset på garden, og her kan du prøve å finne 5 gjenstandanar som ikkje høyrer heime i eit gardshus på 1800-talet. Klarer du alle 5?
Husa på garden kjem frå Indre Sogn og dei fleste er bygde på 1800-talet. Tunet består av hovudhus, stabbur, loft, løe, fjøs, stall og grisehus, samt uthusa smia og turkestova.