Kvart år i mai inviterar museet til arrangement knytt opp mot nasjonaldagen, og temaet for årets museumssøndag var husflid.
Ute i Moritsstova var det i anledningen kursing i både karding og spinning av ull, og hosebandfletting saman med museumspedagog Trine Anette Fostervold. Dei besøkande fekk høve til å prøve seg på ull frå lokale sauer, og fekk spinne på både handtein og rokk. Fostervold hadde òg laga i stand eit kurs i hosebandfletting, der ein fekk legge opp trådar, opplæring i sjølve flettinga og sjølvsagt ta med seg arbeidet heim.
Eit hoseband er det du finn rundt knea på herrebunaden her i Nordfjord, forteljer museumspedagogen. Når ein skal flette slike band treng ein ullgarn, gjerne to- eller tre-tråds garn, og her i Nordfjord er er det grønt, rødt og kvitt garn som er brukt. Funksjonen til hosebanda er å halde knestrømpene oppe når ein går med bunaden.
Inne i kafeen hadde museumsvert Ingvild Førde stasjonar der ein kunne veve seg ein nøkkelring på kabylsk vev, og prøve seg på tradisjonshandverket hakking.
Hakking, også kjent som tunisisk hekling, er ein teknikk mange her ikkje kjenner til i dag, forteljer museumsverten. Det kan minne litt om vanleg hekling, men i stadenfor ein liten heklekrok så brukar man ein lang heklekrok, og ein aukar og fell masker med denne. Er du interessert i å lære meir om teknikken, så ta kontakt med museumsverten neste gong du er innom museet!
Denne dagen var det også omvisning i årets utstilling Dyrebar, saman med museumspedagog Trine. For å lese meir om utstillinga, kan du klikke her.
Neste museumssøndag blir 2.juli med temaet attåtnæringar, følg med på nettsidene eller i våre sosiale medier-kanalar for meir informasjon!