Vi ynskjer velkomen til sesongavslutning på Sunnfjord Museum. Denne dagen markerer vi avslutninga på sommarsesongen 2023. Det blir ymse aktivitetar ute og inne, og læring og leik for heile familien!
Program for dagen:
Kl. 12: kan du bli med på tur til museumsstølen. Det er ein liten gåtur frå parkeringsplassen. Hugs å ta på vasstette sko. På stølen fortel formidlaren om stølslivet på 1800-talet, og sagn om huldrefolket.
Etter stølsturen skal mjølkeseperatoren settast saman, og vi separerer mjølk.
Kl. 14.30 blir det familieomvising med tur i Østenstadstova og skulestova.
I verkstaden står handverkaren klar med spikkeknivar, og ulike verktøy du kan bruke til å arbeide i trevirke.
I Eldhuset kan du kverne korn med handkverna, og i eldstova kan du møte konservatoren vår. Ho har funne fram ulike gjenstandar, og du kan spele "gjett gjenstanden".
I tunet kan du prøve å bære vatn med vasselen, prøve uteleikane eller lage din eigen leikebåt.
I utstillingssalen kan du sjå Livreddaren. Utstillinga tek føre seg treeinigheten mellom landskap, dyr og menneske. Gjennom fotografi, handverksprodukt og installasjonen Ullgloa blir du kjent både med sauen og ulla. Som del av utstillinga er det også eit aktivitetstilbod der du kan prøve å karde og spinne, nålefilte og flette, for å bli enda betre kjent med materialet.
Museet er ope kvar dag i sommar med utstilling, butikk og enkel kafé med kioskvarer, kaffi og is.
12.-13. august er siste helgeope i sommar.
NB! På dagar med arrangement ynskjer vi at alle som skal nytte seg av museumsområdet løyser billett.
Velkomen!