De Heibergske Samlinger – Sogn folkemuseum har 51 antikvariske bygningar, der 46 er oppsette medan fem er lagra. Desse daterer seg frå 1500-talet til 1980-talet. Det første huset som kom til museet var Underdalsstova i 1903. Då museet var lokalisert i Amla vart husa sette opp på rekke og rad som på utstilling. I forbindelse med at museet vart flytta til Vestreim på 1970-talet vart det utarbeidd ein plan av arkitekt Arne Berg for plassering av bygningane. Gardsbygningane vart samla i tun til Indre Sogn-tunet og Midtre Sogn-tunet. For tida er Ytre-Sogn tunet under oppføring med bygningen Hemrebui. I tillegg til gardstuna og gardsbygningane har museet ein strandsitjarplass, Henjasanden, samt bustader for den øvre sosial klasse som Kvitevollstova og prestegarden frå Vik. Frå 1980-talet byrja museet å bygge opp ei 1900tals avdeling og i dag har vi hus frå 1939, 1964 og 1987. På museumsområdet har museet også kvern, vetahus, skulebygning (frå Helgheim folkehøgskule) og ved fjordmuseet har vi ei skjenkestove frå Gulen.  

Utanom museumsområdet på Vestreim har museet ei sag på Tingastad, eit småbruk i Eide, og ei mølle og ein villa i Sogndalsfjøra.   

Museet har fem bygningar som ligg lagra; Fossenstova, ei hytte frå 1970-talet, Goroselet og eit naust. Dessutan har museet også eit meieri, men dette er i så dårleg forfatning at det ikkje er plan om å setje det opp att.