Det tok nokre nerveprirrande timar. Centimeter for centimeter vart Holvikejekta dratt og skubba framover togskinner ved hjelp av Hardanger Fartøyvernsenter. Klokka halv fire den 29. januar 2025 var ho komen til sin sluttdestinasjon.
– Å få den under tak var ein viktig milepel. Det er ei stor glede og lette å vite at Holvikejekta no blir bevart for framtida og at publikum kan få oppleve ho i generasjonar framover. Det neste store er opninga i juni, då bygget er ferdig og vi kan feire i lag med innbyggjarar og besøknade, seier Anne Kristin Moe, museumsleiar ved Nordfjord Folkemuseum.
Då Holvikejekta vart sjøsett i 1881, var det folkefest på Sandane. Dei feira framtidshåp med ny båt. Den 6. juni 2025 feirar vi både fortida og framtida. Vi feirar at kulturskatten får ein ny heim, og kva denne nye heimen kan føre med seg for framtida til Sandane.
Kulturministeren vil opne
– Opninga markerer slutten på eit prosjekt som har gått føre seg i snart 120 år, så det fortener ein skikkeleg fest. Vi er veldig glade for at kultur og likestillingsminister Lubna Jaffrey tek turen. Det er ei ære å få fullføre dette prosjektet på vår vakt, eg trur mange føler det slik, seier Jan Heggheim, administrerande direktør i Musea i Sogn og Fjordane.
Den 24. april tek Musea i Sogn og Fjordane gjennom Nordfjord Folkemuseum over bygget frå entreprenør Veidekke, etter elleve månader med byggearbeid. Då står det att halvanna månad med intenst utstillingsarbeid, før dørene kan opnast.
– Vi arbeider med utstillingstekstane og val av bilde. Det blir ei tekst- og bildebasert utstilling som ikkje skal ta luven av hovudobjektet: jekta sjølv. To store gjenstandar kan vi ikkje la vere å vise, nemleg det originale jektespelet, som vart brukt til å heise seglet og jekteskruane som vart brukt når ein skulle sette jekta på land. Vi er så heldige å få bruke Bernard Færøyik sine flotte og detaljerte teikningar som kjem til å komplettere dei historiske fotografia og objekta på ein kjempefin måte, seier Moe.
Ope kvar dag i sommar
I 2025 vil Holvikejekta Nordfjord Folkemuseum vere opent for besøkande frå 9. juni og ut august. I tillegg vil det vere ope enkelte helger, spesielt i samband med arrangement. Skular vil også få tilbod om formidling.
– Det blir ei stor oppleving i seg sjølv å kunne sjå jekta frå ulike perspektiv, ovanfrå og nedanfrå, å gå ved sidan av, bak ho og langs ripa. Gjennom tekst og bilde vil vi fortelje om jektefarten på Vestlandet, slik at denne konkrete jekta blir sett i ein større samanheng. Dette har vi også med oss når vi kjem opp på mesaninen, der det er stilt ut tre nordfjordbåtar. Her er temaet båtbygging, og vi fortel om klinketradisjonen som er teknikken som er brukt i både båtane og jekta, eit handverk som no er på UNESCO si liste over menneskeheita sin kulturarv, avsluttar ho.
