Ferietips: 13 opplevingar å bli rikare av

Har du drøymt om å leite i skuffene i ein gamal landhandel? Museumspedagog Nina har opna både landhandel og skomakarverkstad på Sunnfjord Museum. Saman med eit nyrestaurert freda loft frå 1600 talet og ei utstilling om museet si historie, markerer desse nye opplevingane at Sunnfjord museum er 100 år i 2026.

Ved Nordfjord Folkemuseum kan du sjå både brurekroner, Nordfjordbunader og folkedrakter. I utstillinga «Saman» får vi lære korleis menneske har levd i lag - og sjå kva dei gifta seg i. Utstillinga "Attåt" viser korleis framstilling av bunader og andre tekstilar også har vore ei viktig tilleggsnæring på gardane.

Ein av favorittane til museumsvert Hanna ved Sogn Folkemuseum, er "flaskebotnvindauga" i den rundt 300 år gamle Undredalsstova. Kvart av museet sine 44 kulturhistoriske bygg har sin eigen historie om både folk, bruk og byggeskikk. Lær og lev deg inn i forteljingane med museet sin audioguide!

Ho måla til ho var 102 år gamal, og spesialiteten var portrett av barn. Kurator Kristine Kolrud ved Sogn og Fjordane Kunstmuseum i Førde har pakka den hardtarbeidande Frida Rusti (1861-1963) fram frå gløymselen med ei eiga utstilling.

Lærdal vert aldri det same etter at du har sett Hans Gjesme (1904–1994) sine grøne landskapsbilete derifrå. Kurator Ingrid Norum har sett saman utstillinga "Høgdepunkt", der du også får gjesmeperler av arkitektur, byliv, stilleben, portrett og skildring av sjukdom og einsemd på Gaustad sjukehus.

I vår fekk hagen etter kunstnarparet Nikolai og Engel Astrup den høgthengane Europa Nostra kulturarvsprisen. Eit mangeårig restaureringsprosjekt i Astruptunet har gitt nytt liv i den grøne oasen. Her kan du oppleve eit mangfald av vekstar, rusle på stiane, kvile på benkane. Få også med deg den nye utstillilnga "Ein kreativ heim"!

Eikaasgalleriet i Jølster skildrar korleis kreative kvinner har funne eit levebrød gjennom vevstol og anna kunsthandverk i Jølster. Olin Steinsvik har vore med og samla vevnader og anna handverk, og fortel ei historie om hardt arbeid og lange trådar i utstillinga «Livsnerven – frå stove til atelier».

Med måleri av krappe fjordbølgjer eller ungjenter i folkedrakt, inspirerte Hans Dahl overklasse og kongelege frå Europa til å besøke Balestrand og Vestlandet. I ei ny utstilling viser Guri Våge Mossige ved Norsk Reiselivsmuseum korleis Dahl sette Norge på turistkartet.

Holvikejekta har fått eit nytt museum på Sandane i Nordfjord. Jekta står i ei særstilling av bevarte skuter, og blir kalla sjøens stavkyrkje av ekspertar. Museumsvert Ingvild fortel det du treng å vite om jektefarten langs kysten vår i det nye museet.

På Sogn Fjordmuseum i Kaupanger kan du oppleve båtar og fiskereiskap i tre etasjar. Her får du forteljinga om fjorden som livsnerve, ferdsleveg og matfat for sognebygdene. Spesielt har sognebåten vore viktig. Museumsvert Anette Uglum Vikdal likar å vise fram båtbyggjarverkstaden, der ein får innblikk i handverket som ligg bak.

Ser vi vekk frå vikingskipa, kan Bakkejekta vere ein av dei eldste bevarte båtane i Norge. Museumsleiar Annette Langedal Holme fortel publikum at den er omlag 250 år, og gjekk med varer frå Dalsfjorden til Bergen. Du finn den i båthallen til Kystmusett i Sogn og Fjordane i Florø.