I Musea i Sogn og Fjordane blir du del av eit mangfaldig lag på 60 tilsette. Vi jobbar i fire ulike avdelingar, fordelt over tolv museum, administrasjonen på Sandane og Tinghuset i Førde.
Velkomen til Musea i Sogn og Fjordane! Vi er ein mangfaldig gjeng med stort engasjement for oppdraget - å ta vare på og vise fram vår felles kunst- og kulturarv.
Vi har ansvaret for å drive tolv museum mellom fjord og fjell i nordre del av Vestland fylke. Våre tilsette er vertskap, driv med formidling, forsking, samlingsforvalting og tradisjonshandverk. Staben jobbar dessutan med HR, administrasjon, IT, økonomi, drift, kommunikasjon, marknadsføring og leiing.
Vi jobbar for at både gjester og tilsette skal bli rikare som menneske. Hjå oss skal ein få kjensla av å høyre til ein stad. Bli sett og verdsett. Vi trur trivsel og motivasjon gjev eit rikt arbeidsliv, det gjev utviklingslyst.
Lenka til stillingsutlysingar ovanfor, er inngang til å søke jobb hjå oss. Vi tek ikkje imot søknader på e-post grunna personvernomsyn. Når søknadsfristen har gått ut, går vi igjennom søknad og cv til alle kandidatane. Så kallar vi inn dei best kvalifisert for jobben til intervju. Dei som ikkje er med vidare, får e-post om det.
Museumspedagog Filippo Olari i Kvernsteinsparken.
Intervjuet
I intervjuet møter du den som vert næraste leiar. Så kan det variere litt kven andre som er med, men HR-sjefen eller ein fagperson er det normale. Etter første intervjurunde, vil ein, i dei fleste høve, kalle inn til eit intervju nummer to for dei som er mest aktuelle til stillinga.
For å sikre eit breitt vurderingsgrunnlag når vi skal tilsetje nokon er det ofte fleire aktivitetar i tillegg til intervju, som for eksempel oppgåveløysing og/eller personlegheits- og motivasjonstestar.
Tilsettingsprosessen
Eit eige tilsetjingsutval er med i bakgrunnen av alle aktivitetar i tilsettingsprosessen. Utvalet består typisk av næraste leiar, HR-sjef og representantar for dei tilsette.
Museumshandverkar Jill Tefre og kollega under eit stabbur på Vågsberget.
Kandidatane vert rangert etter kven som er best kvalifisert og eigna til jobben. Den høgast rangerte kandidaten får tilbod om jobb.
Etter at ein kandidat har takka ja, vil alle som har delteke i prosessen, få informasjon om at den er avslutta.
Oppstarten
Før du byrjar hjå oss, får du tilsendt ein plan med møter og aktivitetar dei første dagane på jobb. Det vil typisk vere planar for opplæring og møter med viktige personar for stillinga. Du får også ein fadder som kan bidra med å svare på spørsmål og sikre at du kjem godt på plass.
Samlingsforvaltar Sergio Tassi studerer strekkodar på Tinghuset.
Arbeidsmiljøet vårt
Vi har årlege medarbeidarundersøkingar. Dei viser at arbeidsmiljøet er godt og at dei aller fleste er godt fornøgd med jobben sin.
Korleis er lokala våre
Vi har tolv museumsarenaer rundt i Sogn og Fjordane, administrasjonen sine kontor og fellesmagasinet Tinghuset. Lokala våre vil naturlegvis difor variere, også etter stillingstype.
Slik vert tilsette følgt opp
For oss er det viktig å sikre at alle tilsette får god oppfølging alt etter behov. Eksempel på dette er årleg medarbeidersamtale og lønssamtale, der ein er innom viktige tema som motivasjon, trivsel og utvikling.
Museumsleiar Anne Kristin Moe ved Nordfjord Folkemuseum.
Slik legg vi til rette for fagleg utvikling
Vi oppfordrar til, og legg til rette for, at våre tilsette skal få utvikle seg fagleg. Kvar tilsett har eige budsjett for å delta på kurs og opplæring. Utvikling og kompetanseheving er på agenda i årleg samtale med leiar.
Fagforeiningane våre
Forskerforbundet (tilslutta Unio) organiserer typisk vitskapeleg tilsette hjå oss. Museumansattes forening (tilslutta YS) organiserer til dømes vertar og handverkarar. Tilsette vel sjølv om ein vil høyre til ein av desse, ein som ikkje har representantar på arbeidsplassen eller ingen fagforeining.
Avdelingsdirektør for kunst, Tor Martin Leknes, monterer Astrup-utstilling.
Mangfald gjer oss rikare!
Vi i Musea i Sogn og Fjordane ønskjer oss ein arbeidsplass som speglar mangfaldet i samfunnet vi lever i. Er du kvalifisert spelar det inga rolle kva alder, funksjonsvariasjon, kjønn, seksuell orientering, religion eller etnisk bakgrunn du har. Vi ønskjer oss tilsette med ulike kompetansar, fagkombinasjonar, livserfaring og perspektiv. Det er suksessoppskrifta vår for å løyse oppgåvene best mogeleg. Vi ønskjer å legge til rette for at nettopp du skal kunne jobbe hjå oss!
