Filmvising og kunstnarsamtale med Motaz Al-Habbash

Velkomen til vising av kortfilmen The Donkey of October 7th, etterfølgt av ein samtale mellom kunstnar Bjørn Venø og filmskapar, kunstnar og produsent Motaz Al-Habbash.

Før visinga vil Al-Habbash gi ei kort innføring i filmen og fortelje om bakgrunnen for prosjektet og idéen som ligg til grunn. Arrangementet gir eit unikt høve til å oppleve filmen i møte med kunstnaren bak, og til å få eit nærare innblikk i dei kunstnarlege og menneskelege erfaringane som ligg bak verket.

Etter visinga møtest Venø og Al-Habbash til ein samtale om korleis det er å skape kunst under ekstreme og krevjande forhold. Med utgangspunkt i filmen vil Al-Habbash dele erfaringar frå det å lage film i Gaza i dag, og reflektere over korleis krigen og livsvilkåra har påverka den kunstnarlege praksisen hans. Samtalen opnar òg for refleksjonar kring kunst som vitnemål, motstand og menneskeleg uthald.

Arrangementet blir halde i samband med to aktuelle utstillingar i museet, de:HUMANIZE og Frida Rusti «Eg målar i draume». Sjølv om utstillingane er ulike i uttrykk og tematikk, komplimenterar dei kvarandre gjennom å løfte fram spørsmål om identitet, tilhøyrsle og møte mellom ulike kulturar. Dette er òg sentrale tema i Motaz Al-Habbash sitt kunstnarskap, og samtalen vil gi eit utvida perspektiv på problemstillingar som også kjem til uttrykk i utstillingane.

Motaz Al-Habbash er ein palestinsk kunstnar, filmskapar, produsent og kurator busett i Noreg, og er for tida stipendiat ved Akademie Schloss Solitude i Stuttgart. Gjennom sin kunstnariske praksis utforskar han spørsmål knytt til identitet, fordriving og søk etter ein heim i eksil. Habbash er initiativtakar til ei rekkje ulike prosjekt, til dømes kunst- og kulturplattformen It Is Hard to Be an Arab (Oslo, 2017) og Her og der, eit program som støttar kunstnarar som nyleg har kome til Noreg. Han skipar møteplassar på tvers av kulturar og skapar moglegheiter for unge kunstnarar.

Bjørn Venø (f 1979, busett og arbeider på Venøy i Stad kommune) er ein kunstnar som jobbar med foto, video, performancekunst, skriving, teikning og musikk. Det å mislykkast, identitet, kjønn og metafysikk vert utforska ved å bruke fri assosiasjon, intuisjon og eigenskapane til narren. Venø har ein master i fotografi fra Royal College of Art i London. Arbeida hans er i museumsarkiv ved Norton Museum of Art, West Palm Beach, Florida, USA, og Museo Palazzo Riso, Palermo, Italia.