Sommaren er her, og det er klart for nye familiedagar på Sunnfjord Museum!
Torsdag 3. juli får vi inn hestekrefter og slåttekarar for å slå teigen vår i Movika, og vi inviterer deg til å bli med på tradisjonelt slåttearbeid. Du kan vere med å rake og hesje, og vi lærer deg å slå med ljå og stuttorv.
Dette kan du oppleve på Slåttedagen:
Bli med på tradisjonelt slåttearbeid! Du kan lære å slå med ljå og stuttorv. Når graset er slått, rakar vi og heng det til tørk på hesene. Du treng ingen erfaring for å vere med - våre dyktige museumsarbeidarar lærer deg teknikkane.
Lag strådukker med representantar frå Norsk Bonde- og Småbrukarlaget. Lær om livet som småbrukarbonde i Sunnfjord.
Delta i folkeforskingsprosjektet Den ville pollinatortellingen. Tradisjonelle jordbruksmetodar er snille mot dei pollinerande insekta som lever i og av engene vi slår. Det er viktig å beskytte insekta slik at vi sikrar vekst av nye plantar til neste slått. Lær korleis å identifisere pollinerande insekt som humler og bier, og bli med på pollinatorjakt på museet.
Etter slåttearbeidet vert det servering av rømmegraut i Sersjantløa. Velkomen til bords!
Hjarteleg velkomen til Slåttedagen på Sunnfjord Museum!
Utstilling
I utstillingssalen kan du sjå utstillinga Spelemenn og sognekjerringar: underhaldning i det norske Amerika.
Utstillinga er laga i samband med utvandrarjubileet 2025, og presenterer utvandring frå Sunnfjord, Nordfjord og Sogn til USA og Canada gjennom historier om norsk-amerikanske musikarar og komikarar med bakgrunn i gamle Sogn og Fjordane fylke.
Museumsbutikk og noko å bite i
Museumsbutikken er open og her er sal av kioskvarer som is, brus, kaffi og kjeks. Nokre varer er gluten- og laktosefri. Spør i resepsjonen. På familiedagar og dagar med arrangement sel vi vaflar.
Vi har nokre sitteplassar i museumsbutikken. På dagar med arrangement kan ein også sette seg inn i Huus-stova. Når det er godt vær kan vi anbefale å finne ein av sitteplassane ute i tunet.