Vi ynskjer velkomen til den siste familiedagen denne sommaren.
Denne dagen set vi fokus på eit viktig råmateriale; Ull!
Museumspedagog, Nina, vil vise deg korleis du kan karde ull, og spinning på rokk og handtein.
I Huus-stova kan du også prøve nålefilting, ein teknikk der ein nyttar ei nål til å karde og forme ulla.
Eit detaljert program for dagen kjem.
Vi har også andre aktivitetar på museet denne dagen.
Du kan:
- klappe museumsgeitene i tunet
- kverne korn med handkvern i eldhuset
- prøve uteleikar som ringspel og stylter
- kikke inn i kvernhuset og stabburet.
- prøve å bære vatn med ein vassele
- lage leikebåt.
Utstilling
I utstillingssalen kan du sjå utstillinga Spelemenn og sognekjerringar: underhaldning i det norske Amerika
Utstillinga er laga i samband med utvandrarjubileet 2025, og presenterer utvandring frå Sunnfjord, Nordfjord og Sogn til USA og Canada gjennom historier om norsk-amerikanske musikarar og komikarar med bakgrunn i gamle Sogn og Fjordane fylke.
Museumsbutikk og noko å bite i
Museumsbutikken er open og her er sal av kioskvarer som is, brus, kaffi og kjeks. Nokre varer er gluten- og laktosefri. Spør i resepsjonen. På familiedagar og dagar med arrangement sel vi vaflar.
Vi har nokre sitteplassar i museumsbutikken. På dagar med arrangement kan ein også sette seg inn i Huus-stova. Når det er godt vær kan vi anbefale å nytte ein av sitteplassane ute i tunet.