I sommar inviterer Sunnfjord Museum til aktivitetsskulen Sommarleik!
Sommarleik er tre aktivitetsdagar for born i alderen 9 - 13 år, og varer i dagane 21.-23. juni, klokka 09.00-15.00.
På Sommarleik legg vi vekt på at vi skal ha det moro og lærerikt. Borna skal få prøve seg på ulike aktivitetar, og få utfordringar, kjenne meistring og få vener. Rammene for dei tre dagane er museet og museumsområdet, og vi skal vere både ute og inne.
Påmeldingsfrist 14. juni. Påmeldinga er bindande.
15 plassar.
Pris: kr. 800 (inkludert lunsj alle dagane.)
Tidspunkt: 21.- 23. juni, Klokka 09.00 - 15.00, alle dagar.
Meld deg på i det elektroniske skjema under (opnar i Google forms)
Påmeldingsskjema
"Mange av våre besøkande er barn, men då ofte saman med familien sin. Vi hadde lyst å lage ein sommarskule, for borna, slik som til dømes idrettskulane er lagt opp. Inspirasjonen kjem frå Kystsommarleik, eit tilsvarande tilbod på Kystmuseet i Florø. Det har blitt arrangert kvar sommar i ei årrekke. Her lærer born om kystkultur, livet i havet, og dei er ute i båt og fiskar.
På Sunnfjord Museum skal vi også ut i båt på Movatnet som ligg rett nedanfor friluftsmuseet. Borna får lære å ro og sette garn. Vi håpar på bra fangst for vi skal nemleg lage mat av det vi får ", seier museumspedagog og leiar for Sommarleik, Nina Renate Brendsdal.
Andre vaksne som borna møter på aktivitesskulen, er Steinar Lindstrøm. Han er kokk og sjef for matlaginga. Saman med han er fire spreke pensjonistar som tidlegare var «Movika not- og samkomelag». Gruppa var aktive med fiske, matlaging og roing i trebåt her i Movatnet. Dette er kunnskapsrike karar som deler av sine erfaringar vidare til borna, noko som absolutt er gull verdt!
Handverkarane på museet, Stig Magne Spjutøy og Knut-Arve Helle, skal lære borna smiing og spikking i treemne rett frå skogen.
Vi ynskjer at borna skal gå herifrå med noko som dei har laga sjølv. På verkstaden lærer dei å spikke ei sleiv, ein visp, eller noko heilt anna som dei ynskjer å lage. Inne i utstillingssalen skal vi nålefilte, flette, karde ull og prøve å spinne garn.
"Akkurat no jobbar vi med å ferdigstille programmet for dei tre dagane. Dette vert veldig kjekt, og vi gler oss til å møte ungane som har meldt seg på!", seier Brendsdal.
Ta kontakt med museumspedagog Nina Renate Brendsdal på tlf. 41 42 19 59 eller
send ein e-post på ninbre@misf.no.