Velkomen til hår- og hovudplaggutstilling på Sunnfjord Museum!
Vandreutstillinga «Hovudplagg og hårmote - i folkedrakt og bunadbruk» er laga av Norsk Folkedraktforum. Utstillinga er eit resultat av eit større prosjekt med innsamling, registrering og rekonstruksjon av tradisjonell draktskikk og håroppbinding. Måla med prosjektet er mellom anna å få hovudplagget i aktiv bruk i samsvar med tradisjon, og å informere om hovudplagg og håroppbinding som del av ein draktskikk.
I utstillinga får du sjå over 60 hovudplagg frå store delar av landet. Av dei finn vi mellom anna høgehue frå Jølster i Sunnfjord og tobladshuer frå Nordfjord.
I utstillinga på Sunnfjord Museum vil publikum også få sjå bilete av lokale drakttradisjonar.
I lesekroken finn du lesestoff om drakt- og bunadstradisjon, og på aktivitetsbord i utstillinga kan du prøve å veve på grindvev og lage band på kabylsk vev.