Velkommen til førjulsdag på museet!
I tradisjon tru inviterar vi til juleaktivitetar på Nordfjord Folkemuseum. Museet held ope frå kl. 11-15, og det blir aktivitetar inne og ute for store og små på årets siste museumssøndag.
Inne i resepsjonsbygget:
Juleutstilling
Julebutikk
Kafé
Utstillingane Saman og Attåt
Friluftsmuseet:
Juleutstilling i Otnheim, Sæta, Morrits og Sydnes. Omvisning kl. 13 med Anne Kristin
Fargeriet: Maling av korn med Alexander
Frislidlada inne: Baking med Karoline, snekkerverkstad med Steinar
Skulestova: Juleverkstad med Ingvild
Lysstøyping med Margit
Familieaktivitetar
I skulestova er det rigga til juleverkstad. Her kan du lage tradisjonell julepynt med silkepapir, julelenker, papirkorger, eller kanskje du treng ei julebukkmaske til jul? Vi stiller med alt utstyr, her er det berre fantasien som setter grenser.
I Frislidlada kan du få prøve deg på baking saman med museumspedagog Karoline. Det blir baking av tradisjonsbaksten fiskebrød.
Men det blir ingen julebakst utan mjøl! Vi får besøk i Fargeriet av Alexander Rauboti frå Kvernsteinsparken, som vil lære deg å male eige mjøl på handkvern frå Hyllestad.
Vår mest populære aktivitet er med i år også - nemlig lysstøyping! Her du kan nytte høve til å støype deg julelys saman med Margit.
Nytt av året er at du kan få lage eit fuglebrett saman med Steinar. Vi stiller med utstyr slik at du får laga deg eit matfat til småfuglane.
Juleutstilling
Vi inviterar til jul både ute og inne, og i friluftsmuseet har vi pynta nokre av våre antikvariske bygningar med historisk julepynt som viser utviklinga av juletradisjonar i Nordfjord gjennom 400 år. Det blir omvisning i desse kl. 13.
I Otnheimsstova er det pynta til jul slik det var på 1600-talet. I Sætastova viser vi 1700-talet, i Morritsstova viser vi tidleg 1900-tal og i Sydneshuset viser vi 1960.
Inne i kaféområdet finn du juleutstillinga vår. Denne handlar det om tradisjonar knytt til jul. Vi har valgt å ha fokus på juledrikken, julematen og juletreet. Vi har også gjenskapt to historiske juletre etter skildringar frå 1800-talet - 14 år gamle Jakob på garden Djupedal i Selje sitt juletre frå 1879, samt Gustava Kielland si skildring frå 1840-talet.
Vi oppdaterar programmet fortløpande.