Handverk- og husflidsmesse

Sunnfjord Museum og Midtre Sunnfjord husflidslag ynskjer hjartleg velkomne til vår tradisjonelle handverk-og husflidsmesse!

Nesten 20 utstillarar kjem til Movika, og har med seg eit variert utval av sjølvproduserte varer for sal, som vev- og strikkeprodukt, metallarbeid, trevarer og keramikk. Her kan du lese meir om Vilde Nena Aarseth som kjem på messa for fyrste gong, og oversikt over dei andre utstillarane.

Handverk- og husflidsmessa er eit godt høve til å starte julegåvehandelen. Eller kanskje du treng inspirasjon til eigne prosjekt? Messa er eit høve til å treffe andre handverk-og husflidsinteresserte, og du kan høyre meir om arbeidet i Ung Husflid og Midtre Sunnfjord Husflidslag.  

Aktivitetar for store og små

Utstillarane er plassert i tre av dei antikvariske husa på museet. På resten av området er det eit utval av aktivitetar for heile familien. Det blir spikking med Leiv Sølvberg gjennom Noregs Husflidslag sitt prosjekt Rundt bålet, uteleiker og leikebåtaktivitet i tunet. I utstillingssalen på museet kan du sjå utstillinga Livreddaren som har aktivitetar som nålefilting, fletting, veving og karding. Begge dagane har vi tilbod om omvising i Østenstadstova og husmannsplassen. Omvisinga tek ca. 1 time.

Utan mat og drikke...

Husflidslaget har koseleg kafé i Halbrendshuset, der du får kjøpt heimelaga natron- og mjølkekaker, og det er sjølvsagt sal av kaffi og te. Inne på museet sel vi is og enkle kioskvarer.