– Linefiske er ein hjørnestein i livet på kysten i Sogn og Fjordane. I sommar skal publikum som tek turen til Måløy få sjå korleis det har gått føre seg tidlegare, seier administrerande direktør Jan Heggheim i Musea i Sogn og Fjordane.
![Smilande mann med grått skjegg framfor styrehuset på fiskebåt.](/img/asset/YXNzZXRzL21pc2YvMjAyNC0wMy0wN18xMy0wM19oYXVnZWZpc2stNS5qcGc=/2024-03-07_13-03_haugefisk-5.jpg?w=2000&h=1333&s=ffa15725dcab4287da4b7d7bc2f1d614)
Frå slutten av mai opnar landgangen til Haugefisk for publikum. Då kan den som ønskjer få komme om bord og sjå korleis fiskarar jobba og levde under dekk i opp mot sju veker i strekk. Men før det må båten utbetrast.
Første stopp Stadyard
– Det er eit stort økonomisk løft for oss å gjere Haugefisk seglingsklar igjen. I april skal den på reparasjon i slippen til Stadyard. I mai skal den sertifiserast til å gå langs kysten og ta passasjerar om bord. Samla lyt vi ut med om lag 1,6 millionar kroner, seier Heggheim. Det er eit spleiselag mellom stat, fylkeskommune, kommune og museet sjølv.
![Fiskefartøy ved kai framfor eit industribygg.](/img/asset/YXNzZXRzL21pc2YvMjAyNC0wMy0wN18xMy00M19oYXVnZWZpc2stNC5qcGc=/2024-03-07_13-43_haugefisk-4.jpg?w=2000&h=1333&s=283f908ea4fc1ad23aa9f65852d03754)
Haugefisk er ein av dei første shelterdekka autolinebåtane som vart bygd i Norge. Det betyr mellom anna at alle dei 30.000 krokane på lina kunne egnast maskinelt. Fartøyet er på 32 meter og vart bygd i 1978. Shelterdekker eit overbygd arbeidsdekk som verna fiskarane mot ver og vind. For fiskarane og fisket var den ein revolusjon.
Redda frå høggeriet
Museumsbåt ved Kystmuseet vart den i 2005. Eigentleg var den klar for opphogging. Det som ein gong hadde vore den første i sitt slag, var blitt umoderne. Nokre entusiastar i Bremanger ville det annleis. Kystmuseet vart kopla på, og sidan har Haugefisk vore museumsbåt.
![Gruppe eldre smilande personar i trange sittegrupper i ei messe med ko-auge.](/img/asset/YXNzZXRzL21pc2YvMjAyNC0wMy0wN18xMi01M19oYXVnZWZpc2stNC5qcGc=/2024-03-07_12-53_haugefisk-4.jpg?w=2000&h=1333&s=c8260fb089d09af80646f23dc8c160d1)
I dag er det den frivillige gruppa «Haugefisks venner» som ser til båten i det daglege. Det er pensjonerte fiskarar og sjøfolk som er opptatt av å ta vare på historia og drive formidling.
Du kan lese meir om dei og Haugefisk i ein artikkel som kjem seinare. Følg med oss!