Tinghuset ferdig, dei fyller hyllene

Gamle Ramstad Eskefabrikk i Angedalen er ferdig ombygd. Eit trygt, klimastyrt og skadedyrsikkert magasin for oppbevaring av kulturhistoriske gjenstandar og kunst frå museumssamlingane til Musea i Sogn og Fjordane. Den 10. april 2026 vert siste byggetrinn formelt innvia.  

Av dei 3900 kvadratmeterane bygget rommar, er 1783 kvadratmeter fylt med reolar av ymse slag. Resten av arealet er forskjellige spesialrom, personalområde – og ein god del korridorar. Følg arenaleiar Kristine Ness på ei omvising i filmen nedanfor!  

Første byggetrinn vart teke i bruk i februar 2024. Det inneheld sone for mottak, med undersøkings- og reingjeringsrom, varmekammer mot skadedyr, registreringsrom, fotorom, båtmagasin og eit magasin for store gjenstandar.

Fagfolka våre kom raskt i gong med å ta inn gjenstandar. Kristine Ness har med seg samlingsforvaltar Sergio Tassi og magasinforvaltar Agata Bartkiewicz. Nær 2500 ting har fått plass i hyllene så langt, etter at kvar og ein av dei har vore igjennom ein omstendeleg prosess med klargjering og registrering.

No er dei klare til å ta i bruk også undervisingsrom, publikumsmagasin, studierom med tilhøyrande magasin, konserveringsverkstad, båtgarasje, kontor, møterom, og ikkje minst: hovudmagasin for små gjenstandar og tekstil. Dette er på 525 kvadratmeter med 2000 hyllemeter åleine.

Planlagt sidan 1990-talet

Heilt sidan 1990-talet har museumssektoren i Sogn og Fjordane jobba for betre oppbevaringsforhold for dei delane av samlingane som ikkje er stilt ut. Etter mange politiske rundar og forslag, kjøpte Musea i Sogn og Fjordane den nedlagde fabrikken i Angedalen i 2017 for 12,5 millionar kroner. Finansiering for ombygging kom på plass i to etappar. Byggearbeidet tok til i 2022. Med begge byggestega har Tinghuset samla kosta 110 millionar kroner. Staten har bidratt med 58 millionar, fylkeskommunen 22 millionar og Musea i Sogn og Fjordane 30 millionar. Det er Åsen & Øvrelid AS som har stått for byggearbeidet.

Styrker forsking og tilgjengelegheit

Gjenstandane som får plass i Tinghuset no i byrjinga, kjem ofte frå overfylte lager med dårlege forhold for oppbevaring. På Tinghuset vil dei ikkje berre få klima- og skadedyr-trygge omgjevnader, dei vil bli mykje meir tilgjengelege. For det første vil kvar einaste gjenstand finnast digitalt på digitaltmuseum.no. Kven som helst kan sjå bilete og lese informasjon om gjenstandane. For det andre, får kvar gjenstand eit unikt nummer og hylleplassering. Å velje, finne og hente ut gjenstandar for både forsking og utstillingar, vil difor vere mer effektivt enn før. Sjølv om det blir litt reiseveg for mange av musea som har gjenstandar her, er dette eit stort løft for samlingsforvaltinga for alle dei lokale musea våre.   

No kan kollegaer eller eksterne forskarar og andre interessentar, i samarbeid med staben, kunne hente ut gjenstandar frå hyllene, og bruke tid på å undersøke dei i eigne studiemagasin. På bygget er det også ein eigen konserveringsverkstad. Her kan ein klargjere gjenstandar for utstilling, ta nødvendige reparasjonar eller stoppe vidare forfall. 

Eit demokratisk prosjekt

Det ferdige Tinghuset opnar for at innbyggarane kan involvere seg i arbeidet med samlingane. Med ein eigen publikumsdel vil besøkande bli invitert til å delta i samtaler om kva og kvifor vi skal ta vare på dei ulike gjenstandane. Ein slags tingstad. Ikkje minst vil skuleklassar og andre grupper kunne besøke magasinet for å sjå korleis vi jobbar med gjenstandane.

Ikkje alt skal i Angedalen

Alle gjenstandane til Musea i Sogn og Fjordane skal ikkje til Tinghuset. Til dømes har De Heibergske Samlinger og Nordfjord Folkemuseum store magasin, som framleis vil vere i bruk. Men overfylte magasin, låvar, leigde lager og andre midlertidige lagringsplassar, er no under sakte tømming.

Tilsette på Tinghuset vil bruke tida framover til å innreie og få alt til å fungere som det skal. Ambisjonane er å opne tilbodet for publikum i 2027.