Kunstruta - fjord, fjell og kunstutstillingar

I ei verd med krig, konflikt og polarisering, vert menneske dehumanisert. Sogn og Fjordane Kunstmuseum i Førde svarar med å løfte fram menneskelege opplevingar frå heile verda i si nye utstilling «de:HUMANIZE».

Ho måla til ho var 102 år gamal, og spesialiteten var portrett av barn. Kurator Kristine Kolrud ved Sogn og Fjordane Kunstmuseum i Førde har pakka den hardtarbeidande Frida Rusti (1861-1963) fram frå gløymselen med ei eiga utstilling.

Lærdal vert aldri det same etter at du har sett Hans Gjesme (1904–1994) sine grøne landskapsbilete derifrå. Kurator Ingrid Norum har sett saman utstillinga "Høgdepunkt", der du også får gjesmeperler av arkitektur, byliv, stilleben, portrett og skildring av sjukdom og einsemd på Gaustad sjukehus.

Mytane fortel at Nikolai Astrup kjempa imot sin konservative prestefar og vart kunstnar mot alle odds. Årets utstilling i Astruptunet viser at han trass alt vaks opp i ein kreativ heim, med mora som viktig støttespelar. Han var ikkje berre son av ein streng prest, men også sonen til ei veverske og forretningskvinne.

I vår fekk hagen etter kunstnarparet Nikolai og Engel Astrup den høgthengane Europa Nostra kulturarvsprisen. Eit mangeårig restaureringsprosjekt i Astruptunet har gitt nytt liv i den grøne oasen. Her kan du oppleve eit mangfald av vekstar, rusle på stiane, kvile på benkane.

Eikaasgalleriet i Jølster skildrar korleis kreative kvinner har funne eit levebrød gjennom vevstol og anna kunsthandverk i Jølster. Olin Steinsvik har vore med og samla vevnader og anna handverk, og fortel ei historie om hardt arbeid og lange trådar i utstillinga «Livsnerven – frå stove til atelier».

Med måleri av krappe fjordbølgjer eller ungjenter i folkedrakt, inspirerte Hans Dahl overklasse og kongelege frå Europa til å besøke Balestrand og Vestlandet. I ei ny utstilling viser Guri Våge Mossige ved Norsk Reiselivsmuseum korleis Dahl sette Norge på turistkartet.