Vi har laga ei tipsliste for sommarferien, med opplevingar du garantert kjem til å lære av.
Kva med å bruke sommaren til å fråtse i kunnskap? Vi har sett opp forslag til ein «Tour de Museum» med høgdepunkt frå Musea i Sogn og Fjordane.
Sjå kva våre dyktige medarbeidarar presenterer for deg. Lista er delt opp i ulike tema. Om det passar deg best å utforske i nærområdet, sjå kartet nedst for å finne ut kvar dei ulike musea finst.
Norsk Reiselivsmuseum har løfta fram ein kvinneleg reisepioner frå tidleg 1800-tal, Catharine Hermine Kølle. Guri Våge Mossige og stab, har saman med Universitetet i Bergen, laga ei utstilling om denne modige dama som i løpet av 30 år gjennomførte 15 lange vandringar i Norge og utlandet. I bagasjen - skrivesaker, teiknesaker og ein pistol.
Kvernsteinsparken har nett blitt innlemma i Unesco global geopark Fjordkystparken. Museumsleiar Alexander Rauboti vil gje besøkande innsikt i korleis ei 400 millionar år gamal fjellkjede la grunnlaget for hundrevis av år med eksport av kvernstein frå Hyllestad til Nord-Europa. Bak seg har han ei skipslast som truleg gjekk ned i Alverstraumen i mellomalderen.
Vågsberget viser korleis handelsprivilegium kunne skape liv og rikdom. Museumsleiar Annette Langedal Holme har eit stort hjarte for den freda handelsstaden med røter til 1600-talet, og har med seg mange sommarvertar som gjev innlevande omvisingar.
Holvikejekta har fått eit heilt nytt museum i Nordfjord. Jekta står i ei særstilling av bevarte skuter, og blir kalla sjøens stavkyrkje av ekspertar. Anne Kristin Moe har samla det viktigaste som er å vite om jektefarten til Bergen i det nye museet.
Kystmuseet i Sogn og Fjordane har noko så sjeldan som ein nyrestaurert båtslipp å vise fram. Saman med kollegaer og frivillige har Øyvind Atle Skarstein gjenskapt heile maskinparken som Bertel og seinare Herman Nilsen brukte til å reparere båtar i Florø frå 1933 til 1987. Opplev oljelukta på Nilsenslippen i sommar!
På Sogn Fjordmuseum deler vi forteljinga om fjorden som livsnerve, ferdsleveg og matfat for sognebygdene i tidlegare tider. Museumsleiar Trude Knutzen Knagenhjelm likar å vise fram den mest ruvande båten i samlinga, storebåten Skåsheimbåten, bygd av den legendariske båtbyggjaren Ole Andersen Nybø, kjend som «Gamle –Risen».
Sogn og Fjordane Kunstmuseum tek føre seg spørsmål om vestnorsk identitet. Mayra Henriquez og staben hennar let både gamle meistrar og meir ukjende namn vise eit mangfaldig Vestland i utstillinga «Vest. Verk frå Birger Mowinkels samling.»
Eikaasgalleriet skildrar korleis kreative kvinner har funne eit levebrød gjennom vevstol og anna kunsthandverk i Jølster. Olin Steinsvik har vore med og samla vevnader og anna handverk frå produktive jølsterkvinner, og fortel ei historie om hardt arbeid og lange trådar i utstillinga «Livsnerven – frå stove til atelier».
Kunstnarheimen til Nikolai Astrup nyopna i 2024. Eit mangeårig restaureringsprosjekt sette nytt liv i den fantastiske hagen Astrup skapte. Solveig Berg Lofnes og hennar sommarvertar vil gjere det beste dei kan for at du skal jå koplinga mellom hagen og kunsten han skapte i Astruptunet.
Gal og genial? er eit spørsmål vi stiller på Sogn Kunstsenter. Ingrid Norum har laga ei utstilling som viser over 100 verk som lærdalsmålaren Hans Gjesme skapte medan han var tvangsinnlagt på Gaustad psykiatriske sjukehus i 16 år.
De Heibergske Samlinger – Sogn Folkemuseum står i ei særstilling når det gjeld kulturlandskapet du kan vandre rundt i. Museumsbonde Kjell Krogset bryner ljåen og haustar varsamt av slåtteenga. Bli med på slåttedag 1. juli eller berre la humlene suse. Det gjer dei her.
Sunnfjord Museum viser fram ei historisk eksportvare til USA frå Sogn og Fjordane: folkemusikk, dans og «standupkomedie». Vår norsk-amerikanske museumsleiar Sallie Anna Pisera leita i gamle lyd og bilde-arkiv for å gje deg ei oppleving av dei sjeldne i utstillinga «Spelemenn og Sognekjerringar».
Nordfjord Folkemuseum si nye utstilling «Saman» løftar fram forteljingar om korleis menneske har levd i lag opp gjennom tidene. Konservator Ingrid Berger har greve djupt i magasinet etter passande gjenstandar. Rullestolen etter Kristine Ragnhild Aarseth (1911-1973) er eitt av høgdepunkta. Ho var fødd med cerebral parese og open gane.
